Прэзентацыя кнігі “Мястэчкі Беларусі ў канцы ХVIII – першай палове 19 стагоддзя” гісторыка Іны Соркінай адбылася 1 сакавіка ў абласной навуковай бібліятэцы імя Я. Ф. Карскага.
Пад вокладкай кнігі – сур’ёзнае даследаванне сацыяльна-эканамічнага і культурнага жыцця беларускіх мястэчак. Аўтар працавала над ёй больш дзесяці гадоў. У архівах не толькі Беларусі, але і Расіі, Польшчы, Літвы, Ізраіля знаходзіліся патрэбныя дакументы, матэрыялы. Многія з іх упершыню ўводзяцца ва ўжытак.

Таксама вельмі цікавым атрымаўся дадатак да кнігі, які складаецца з планаў, статыстычных матэрыялаў, фотаздымкаў.  Увогуле, гэту працу можна назваць энцыклапедыяй ўнікальнага феномена – мястэчка, дзе сутыкаліся і ўзаемадзейнічалі розныя веры, этнасы, мовы.
На прэзентацыі выступіў навуковы рэдактар кнігі, вядомы гісторык Захар Шыбека. Ён адзначыў, што беларускія мястэчкі –  каштоўная частка нашай спадчыны, якую патрэбна больш вывучаць.  Праца Іны Соркінай з’яўляецца першым комплексным даследаваннем у гэтай галіне ўрбаністыкі. У планах Іны Валер’еўны праца над новым даследаваннем, на гэты раз  аб мястэчку Капыль.